New Yorkpi

Gladys Camacho Rios, Quechua, Bolivia, Orgullo Boliviano, Quechua en Nueva York
La Paz Boliviamanta avionpi karuta phawamuspa Nueva Yorkkama chayamuni. 6 phanita La Pazmanta pacha Miamikama phawamurqani. Miamipi wak avionman New York “Aeropuerto La Guardiaman” jamuqman wicharirqani. Kasi kimsa phanita phawamullarqanitaq, chay avionpi achkha runa ñuqawan khuska jamurqanu. Paykuna astawanpis inglesta parlarqanku, ni pisina Quechua parlaq karqachu. Mana uyarirqanichu. New Yorkman chayamusqaymanta pacha “Metropi” chakipi ima purini. Metroqa jallp’a uranta mana chayqa yaku ukhunta purin. Jinamanta kunan p’unchaw “Times Squareman” puriykacharikuq lluqsirqani. Runaminqa! Llump’irichkanku! Mana pasay atina, runa sinchita t’iqtukunata jurqhurakuchkanku tukuyniqpi. Chanta Times Square, peliculaspijina sinchita lliphiq kasqa. Ajinallata kunan p’unchaw puriykacharikurqani. Kunan ñañaypa wasinpi puñukapuchkaniña. Allin ch’isi tukuy Boliviamanta masikunaypaq!
Gladys Camacho Rios, Quechua, Bolivia, Orgullo Cochabambino

8 killa Franciapi

2011 watapi Francia suyuman Castellano simita yachachiq rirqani. Lille llaqtaman chayarqani. Juk yachaywasi Eugene Thomas sutiyuqpi Castellano simita yachachiyta yanapaq kani. Astawanpis ñuqaqa Boliviapi kawsaymanta yachakuqkunawan Castellano simipi parlaq kani. Videos ñisqakunata, Salar de Uyunimanta, Toro Toromanta, Amazoniamanta riqsichiq kani. Historia ñisqamanta chanta política ñisqamantapis parlallaqtaq kani. Qhichwa simiytapis tumpitata yachachillarqanitaq. Paykuna sinchita kusikurqanku.

Chanta Franciapi pusaq killata kawsakuchkaspa tumpatawan, kay suyuta riqsinaypaq Parisman wak llaqtakunaman ima rirqani, wak suyukunamanpis riqsirariq rillarqanitaq.